1Ti 2 | YomNWM | STEP | Diawu, ndinlubudila tuamina mambu moso, bika theti ti zindombolo, zitsambulu, nata batu mu lusambulu ayi phutudulu yi matondo bivangama mu diambu di batu boso ;

1 Timothy 2

Wutelo ku lusambulu

1 Diawu, ndinlubudila tuamina mambu moso, bika theti ti zindombolo, zitsambulu, nata batu mu lusambulu ayi phutudulu yi matondo bivangama mu diambu di batu boso ; 2 mu diambu di mintinu ayi babo badi mu bibuangu bizangama muingi tuzinga luzingu lu ndembama ayi lu luvovomo mu khadulu yivedila ayi yi kambulu luvunu. 3 Bila didi diambu di mboti ayi di monisanga Nzambi, Mvulusi eto, khini. 4 Niandi tidi ti batu boso bavuka ayi batula ku diela di zabila mambu ma kiedika.

5 Bila Nzambi yimosi kaka yidi, ayi, phovi yimosi kaka yidi va khatitsika Nzambi ayi batu ; mutu beni Klisto Yesu. 6 Wukiyekula niandi veka mu diambu di kula batu boso. Kiawu kioki kimbangi kitelomono mu thangu yifuana. 7 Mu bila kioki minu ndibiekolo nlongi ayi mvuala. Makiedika ndintuba ; ndikadi vuna ; nlongi kuidi Bapakanu mu minu ayi mu mambu ma kiedika.

Buevi babakala ayi baketo bafueti kadila mu dibundu

8 Diawu thidi ti : babakala basambila mu bibuangu bioso ayi bavumunamioko miawu mivedila kuidi Nzambi mu kambu nganzi ayi ziphaka.

9 Thidi ti baketo bavuata minledi mu phuatulu yi mboti, mukukikulula ayi mu lukinzu. Babika viokisanga tezo mu khangusulu yi zitsuki, babika vuatanga bilunga bi nolo, minsanga voti minledi mithalu. 10 Vayi bika bavanga mavanga mamboti momo mamvanganga baketo bansadilanga Nzambi.

11 Bufueni kuidi nketo mu longuka mu ndembama ayi mu bulemvo. 12 Ndikadi vana minsua kuidi nketo mu longa voti yadila bakala. Vayi bika kaba dio sui. 13 Bila Adami niandi wuba wutheti mu vangu bosi Eva. 14 Ayi Adami kasia vunu ko vayi nketo bu kavunu, wubua mu masumu. 15 Vayi wela vuka mu mbutulu yi bana enati bantatamana diatila mu minu mu luzolo, mu bunlongo ayi mu kukikulula.